12 წლის დედოფლისწყაროელი სურენ ტუმასიანი კიკბოქსინგში საქართველოს ჩემპიონი გახდა
12 წლის დედოფლისწყაროელი სპორტსმენი სურენ ტუმასიანი კიკბოქსინგში, 38,5 კილოგრამ წონით კატეგორიაში, 2026 წლის საქართველოს ჩემპიონი გახდა.
საქართველოს ჩემპიონატი ქალაქ ბოლნისში გაიმართა. ახალგაზრდა სპორტსმენმა ყველა მეტოქე დაამარცხა, ოქროს მედალი მოიპოვა და ქვეყნის ჩემპიონის ტიტული დაისაკუთრა.
აღსანიშნავია, რომ გასულ წელს, ქალაქ სენაკში გამართულ საქართველოს პირველობაზე, ტუმასიანი ფინალში ქულებით დამარცხდა და ვერცხლის მედალს დასჯერდა. მაშინ მან პირობა დადო, რომ საქართველოს ჩემპიონი გახდებოდა.
ერთი წლის შემდეგ სპორტსმენმა მიზანს მიაღწია. მის წარმატებაში განსაკუთრებული წვლილი მიუძღვის მწვრთნელს, თამაზ ყარაგვეზაშვილს.
