სოფელ ყარაჯალაში ნაცემი და დაყაჩაღებული 71 წლის ქალი თელავის ცენტრალურ საავადმყოფოშია გადაყვანილი და მკურნალობას აგრძელებს
პაციენტი კლინიკაში სასწრაფო-სამედიცინო დახმარების ბრიგადამ გუშინ დილით გადაიყვანა.
ექიმის ინფორმაციით, დაზარალებულს სხეულის სხვადასხვა ნაწილში მრავლობითი დაზიანებები აღენიშნება.
„-პაციენტი შემოყვანილი იქნა სასწრაფო-სამედიცინო დახმარების მიერ. აღენიშნებოდა მრავლობითი სისხლნაჟღენთები სხეულის სხვადასხვა მიდამოში, ასევე დაზიანება მარჯვენა თვალ-ბუდის არეში. მისივე გადმოცემით, მასზე იძალადა მისთვის უცნობმა პირმა და მიაყენა ფიზიკური დაზიანებები. ამ ეტაპზე პაციენტის მდგომარეობა სტაბილურია და სიცოცხლისთვის საშიში არ არის. ჩატარებულია შესაბამისი კლინიკურ-დიაგნოსტიკური კვლევები და გადაყვანილია ნევროლოგიურ განყოფილებაში. კლინიკიდან გაწერის საკითხს გადაწყვეტს მკურნალი ექიმი-ნევროლოგი,”- თქვა გადაუდებელი მედიცინის განყოფილების მორიგე ექიმმა, ფიქრია კინდოლაურმა.
მომხდარის შესახებ გამოძიება ყაჩაღობის მუხლით მიმდინარეობს. სამართალდამცავებმა სამი პირი დააკავეს. მათ შორის ერთი მამაკაცი და დედა-შვილია. შვილი წარსულში ნასამართლევი პირია.
