ქალაქ თელავის მდგრადი განვითარებისთვის ერთ-ერთი მთავარი საფუძველი სწორად დაგეგმილი სივრცითი განვითარების გეგმაა. ასეთი დოკუმენტი განსაზღვრავს, როგორ უნდა განვითარდეს ქალაქი მომავალში — როგორ უნდა იყოს განაწილებული საცხოვრებელი, ტურისტული, ეკონომიკური და ინფრასტრუქტურული ზონები, როგორ უნდა შენარჩუნდეს კულტურული მემკვიდრეობა და ამავე დროს შეიქმნას ახალი განვითარების შესაძლებლობები. სივრცითი დაგეგმარება განსაკუთრებით მნიშვნელოვანია ისეთი ისტორიული და ტურისტული პოტენციალის მქონე ქალაქისთვის, როგორიც თელავია, რადგან სწორედ სწორი დაგეგმვა უზრუნველყოფს ქალაქის ჰარმონიულ განვითარებას და მისი რესურსების ეფექტიან გამოყენებას.
ამ საკითხებთან დაკავშირებით საქართველოს რეგიონული განვითარების სამინისტროში სამუშაო შეხვედრა გაიმართა. შეხვედრას ხელმძღვანელობდა რეგიონული განვითარების მინისტრი კახაბერ გულედანი, რომელმაც ყურადღება გაამახვილა თელავის ტურისტული პოტენციალის გაძლიერებასა და ეკონომიკური განვითარების შესაძლებლობებზე. მინისტრის განცხადებით, მნიშვნელოვანია სხვადასხვა უწყების კოორდინირებული მუშაობა, რათა მუნიციპალიტეტის განვითარება ერთიანი ხედვის ფარგლებში განხორციელდეს.
კახაბერ გულედანის თქმით, სივრცითი დაგეგმარების პროცესში განსაკუთრებული მნიშვნელობა აქვს მუნიციპალიტეტის, ადგილობრივი მოსახლეობის, კერძო სექტორისა და შესაბამისი სახელმწიფო უწყებების ჩართულობას. მისი განმარტებით, სწორედ ამ პროცესში ხდება ქალაქის საჭიროებების სწორად განსაზღვრა, არსებული პრობლემების იდენტიფიცირება და იმ პოტენციალის გამოვლენა, რომელიც თელავს განვითარებისთვის აქვს.
სამუშაო შეხვედრას ესწრებოდნენ რეგიონული განვითარების მინისტრის პირველი მოადგილე ლევან ზაუტაშვილი, მინისტრის მოადგილე ზაზა კვიციანი, სამინისტროს წარმომადგენლები, სსიპ — სივრცითი და ქალაქთმშენებლობითი განვითარების სააგენტოს ხელმძღვანელი ზურაბ წიკლაური და მისი მოადგილე სოფო მაისურაძე.
შეხვედრაში მონაწილეობდნენ ასევე კახეთის მხარეში სახელმწიფო რწმუნებული პლატონ კალმახელიძე, თელავის მუნიციპალიტეტის მერი ვაჟა მაღრაძე, თელავის მუნიციპალიტეტის საკრებულოს თავმჯდომარე არჩილ თხლაშიძე, საქართველოს პარლამენტის რეგიონული პოლიტიკისა და თვითმმართველობის კომიტეტის თავმჯდომარე ირაკლი ქადაგიშვილი და საქართველოს პარლამენტის სოფლის მეურნეობის კომიტეტის თავმჯდომარე გელა სამხარაული.
შეხვედრის მონაწილეებმა აღნიშნეს, რომ სივრცითი დაგეგმარების სწორად განხორციელება მნიშვნელოვნად განსაზღვრავს თელავის გრძელვადიან განვითარებას, ხელს შეუწყობს ტურიზმის ზრდას, ინფრასტრუქტურის მოწესრიგებას და ადგილობრივი ეკონომიკის გაძლიერებას.
