2026-2027 სასწავლო წლისთვის, საჯარო სკოლებში პირველკლასელთა რეგისტრაციის დამატებითი ეტაპი 15 მაისს დაიწყება და 25 მაისის ჩათვლით გაგრძელდება
განათლების სამინისტროს ინფორმაციით, სიახლეა ის, რომ რეგისტრაცია ტერიტორიული პრინციპით განხორციელდება, რაც მშობლებს საშუალებას აძლევს, საცხოვრებელი ადგილის მიხედვით, პრიორიტეტულად აირჩიონ სასურველი სკოლა.
ჩამონათვალშია ქალაქი თელავი, რომელიც სასკოლო უბნებად არ არის დაყოფილი. შესაბამისად, მშობლებს შეუძლიათ რეგისტრაცია თელავში მდებარე საჯარო სკოლებში, საცხოვრებელი მისამართის გათვალისწინებით.
სხვა 11 ქალაქში – თბილისში, ბათუმში, ქუთაისში, რუსთავში, ზუგდიდში, ამბროლაურში, ოზურგეთში, ახალციხეში, გორში, მცხეთასა და ფოთში, დამატებითი ეტაპი ასევე მოქმედებს, თუმცა რიგ ქალაქებში სკოლები სასკოლო უბნებადაა დაყოფილი.
მშობლებს ურჩევენ, რეგისტრაციამდე გადაამოწმონ, რომელ სკოლაში შეუძლიათ ბავშვის დარეგისტრირება, რათა საკუთარ უბანში ან საცხოვრებელ მისამართთან ახლოს მდებარე სკოლაში მოხვდეს.
შეგახსენებთ, რომ პირველ ეტაპზე, 18 თებერვლიდან 2 მარტის ჩათვლით, დარეგისტრირდნენ სპეციალური საგანმანათლებლო საჭიროების მქონე ბავშვები.
მეორე ეტაპი, 21 აპრილიდან 8 მაისის ჩათვლით, შეეხებოდა ბავშვებს, რომელთა და-ძმაც სწავლობს სასურველ სკოლაში, რომელთა მშობელიც ამავე სკოლაში მუშაობს ან რომელთა ოჯახიდან ერთდროულად ორი ან მეტი ბავშვი შედის პირველ კლასში.
