მიხეილ ტორაძე – ახალსოფლის ახალგაზრდა აქტივისტი, რომელიც ხელისუფლების ზეწოლასა და მუქარებზე საჯაროდ ალაპარაკდა
გარდაბნის მუნიციპალიტეტში პოლიტიკური აქტიურობა ბოლო წლებში განსაკუთრებით გააქტიურდა. სწორედ აქ, ეთნიკურად შერეულ თემში, ხშირია საუბარი ხელისუფლების ზეწოლასა და პოლიტიკური ნიშნით დევნაზე. ჩვენი რესპონდენტია მიხეილ ტორაძე, ადგილობრივი ახალგაზრდა ბიზნესმენი და „ნაციონალური მოძრაობის“ წევრი, რომელიც გვიყვება, როგორ ხორციელდება ზეწოლა ოპოზიციის მხარდამჭერ ახალგაზრდებზე.
ჟურნალისტი: მიხეილ, რატომ გადაწყვიტეთ, პირველად გელაპარაკათ იმ ზეწოლაზე, რაც თქვენს სოფელში ხდება.
მიხეილ ტორაძე: ამ თემაზე ჩუმად ვეღარ დავრჩებოდი. ბოლო თვეების მანძილზე ჩვენს თემში — განსაკუთრებით აზერბაიჯანელ ახალგაზრდებზე — ხელისუფლება ახორციელებს მორალურ და ფსიქოლოგიურ ზეწოლას. პოლიციელები და ადგილობრივი მოლებიც კი ერთად დადიან სოფლებში და აშინებენ ახალგაზრდებს, რომ თუ ოპოზიციურ აქციებზე ისევ მივლენ, „ციხეში მოხვდებიან“ ან პრობლემები შეექმნებათ ოჯახებში. ეს უკვე შიშის დაბრუნების მცდელობაა, და მე გადავწყვიტე, ხმამაღლა მეთქვა ეს ყველაფერი.
ჟურნალისტი: ვისგან მოდის ზეწოლა და რა ფორმით ვლინდება ის?
მიხეილ ტორაძე: ძირითადად, ადგილობრივი ხელისუფლების მხრიდან — ქართული ოცნების წარმომადგენლები პოლიციასთან ერთად ცდილობენ ახალგაზრდების დაშინებას. ზოგჯერ ეს არის ტელეფონით ზარები, ზოგჯერ კი პირდაპირი ვიზიტები ოჯახებში. მათ ეუბნებიან, რომ თუ ენმ-ს აქტივობებში კვლავ ჩაერთვებიან, სწავლაზე ან სამსახურზე პრობლემა შეექმნებათ.
ჟურნალისტი: თქვენ პირადად როგორ გამოხატეთ პროტესტი ამ ყველაფერზე?
მიხეილ ტორაძე: მე ამაზე არაერთხელ ვისაუბრე პარტიის ოფისში და ბოლოს გადავწყვიტე, საჯაროდაც მეჩივლა. ვფიქრობ, თუ ხალხი ხედავს, რომ ვინმე ხმამაღლა ამბობს სიმართლეს, სხვებიც გაბედავენ. ჩვენი ბრძოლა არ არის მხოლოდ პოლიტიკური — ეს არის ადამიანური ღირსების საკითხი. არ შეიძლება ახალგაზრდა შეაშინო მხოლოდ იმიტომ, რომ სხვა აზრი აქვს.
ჟურნალისტი: რამდენად რეალურია საფრთხე, რომ ეს ზეწოლა შესაძლოა ფიზიკურ დაპირისპირებაშიც გადაიზარდოს?
მიხეილ ტორაძე: სამწუხაროდ, ეს უკვე მოხდა. მე თვითონ 2022 წლის მარტში გამიტაცეს და მცემეს სამი ადამიანმა. არ ვიცი ზუსტად ვინ იყვნენ, მაგრამ მათი საუბრის სტილიდან და სიტყვებიდან ცხადი იყო, რომ ხელისუფლების მომხრეები იყვნენ. პოლიციას მივმართე, მაგრამ რეაგირება არ ყოფილა.
ჟურნალისტი: როგორ ფიქრობთ, რატომ აშინებენ ახალგაზრდებს ყველაზე მეტად?
მიხეილ ტორაძე: იმიტომ, რომ ახალგაზრდები ცვლილების ძალა ვართ. ჩვენს თემში ბევრმა აზერბაიჯანელმა ახალგაზრდებმა პირველად დაიწყეს მონაწილეობა პოლიტიკაში — არა იმიტომ, რომ პარტიაში გვინდოდა შესვლა, არამედ იმიტომ, რომ ვიგრძენით, ეს ჩვენი ქვეყნის მომავალია. ხელისუფლება ამას ვერ ეგუება. მათ ურჩევნიათ ახალგაზრდობა იყოს ჩუმი, მორჩილი და დაშინებული.
ჟურნალისტი: რას ეტყოდით თქვენს თანასოფლელებს, ვინც ამ სიტუაციაში დღესაც შიშობს?
მიხეილ ტორაძე: ვეტყოდი, რომ ვინც სიმართლეს ვამბობთ, არ უნდა გვეშინოდეს. დღეს თუ არ ვიტყვით, ხვალ შეიძლება ვეღარც ვისაუბროთ. მე მჯერა, რომ ბოლოს ხალხის ხმა მაინც გაიმარჯვებს — იქნება ეს ახალსოფელში თუ მთელ საქართველოში.
ჟურნალისტი: მადლობა ინტერვიუსთვის.
მიხეილ ტორაძე: მადლობა თქვენ, რომ ამ თემებზე საუბარს გაბედეთ.
