გურჯაანის მუნიციპალიტეტის მერიის ორგანიზებით „გურჯაანის ახალგაზრდული ფორუმი 2025“ გაიმართა.
ფორუმს გურჯაანის მუნიციპალიტეტის მერის მოვალეობის შემსრულებელი კონსტანტინე ბერიძიშვილი და ადგილობრივი ხელისუფლების სხვა წარმომადგენლები ესწრებოდნენ.
ფორუმის მთავარი თემა იყო „ინსპირაცია და მოტივაცია – როგორ შევინარჩუნოთ ენერგია ცვლილებებისთვის“, რომლის შესახებაც ახალგაზრდებმა პრეზენტაციები წარადგინეს. ჟიურიმ ფორუმის სამი საუკეთესო სპიკერი გამოავლინა, ესენი არიან – გიორგი ჯანიკაშვილი, ანანო ძველიშვილი და ბარბარე ზღაპარაძე. გურჯაანის მუნიციპალიტეტის მერიამ გამარჯვებულებს ბათუმში სასტუმროს ვაუჩერები გადასცა.
პროექტში 15-დან 25 წლამდე ასაკის 120 ახალგაზრდა მონაწილეობდა. ფორუმის მიზანია ახალგაზრდების საზოგადოებრივ, კულტურულ და სამოქალაქო პროცესებში ჩართულობის ხელშეწყობა, მათში ინსპირაციის, თვითგამოხატვისა და ლიდერობის შესაძლებლობების განვითარება.
