2025 წლის რთველის ორგანიზებულად ჩატარების მიზნით, გურჯაანის მუნიციპალიტეტის სოფელ გურჯაანში განთავსებული საკოორდინაციო შტაბი 24-საათიან რეჟიმში იმუშავებს. მევენახეებსა და ღვინის მწარმოებლებს მათ მიერ წამოჭრილი საკითხებისა და შეკითხვების დასაზუსტებლად შეუძლიათ მიმართონ ცხელი ხაზზე – 0322 193 283.
რთველთან დაკავშირებული ინფორმაციის მიღება ასევე შესაძლებელია გარემოს დაცვისა და სოფლის მეურნეობის სამინისტროს ცხელ ხაზზე – 1501.
„სახელმწიფო აგრძელებს მევენახე ფერმერების მხარდაჭერას ყურძნის მოსავლის შეუფერხებლად რეალიზაციის მიზნით. დამატებითი ცხელი ხაზის ამოქმედება კიდევ უფრო შეუწყობს ხელს რთველის პროცესის ეფექტურად წარმართვას,“ – განაცხადა ღვინის ეროვნული სააგენტოს თავმჯდომარემ, ლევან მეხუზლამ.
მთავრობის გადაწყვეტილებით, 2025 წელს კერძო კომპანიებზე სუბსიდია აღარ გაიცემა. ჭარბი ყურძენი სახელმწიფო საწარმო შპს „მოსავლის მართვის კომპანია“ ჩაიბარებს.
📌 შესყიდვის ფასები შემდეგნაირად განისაზღვრა:
- საფერავი (კახეთი) – 1,50 ლარი;
- სხვა საღვინე ჯიშები – 1,20 ლარი;
- არაკონდიციური ყურძენი (შაქრიანობა ≤18%) – 1,00 ლარი;
- დაზიანებული/დაავადებული ყურძენი – 1,00 ლარი.
