საქართველოს კულტურისა და სპორტის მინისტრი თეა წულუკიანი ალავერდში იმყოფებოდა.
საქართველოს კულტურული მემკვიდრეობის სააგენტოს ინფორმაციით, სააგენტოს დირექტორ ნიკოლოზ აზნაურაშვილთან, კახეთის მხარეში სახელმწიფოს რწმუნებულთან, გიორგი ალადაშვილთან, არქიტექტორ-რესტავრატორ ნიკო ზაზუნიშვილსა და საქართველოს კულტურული მემკვიდრეობის დაცვის ეროვნული სააგენტოს წარმომადგენლებთან ერთად, მინისტრი სტიქიის შედეგად სამონასტრო კომპლექსში შექმნილ ვითარებას ადგილზე გაეცნო.
თეა წულუკიანმა- აბბა ალავერდელ მიტროპოლიტ დავითთან, ადგილობრივ სასულიერო პირებსა და სააგენტოს წარმომადგენლებთან ერთად ტაძრის დაზიანებების აღმოფხვრის გზებზე იმსჯელა.
სტიქიის შემდეგ განსაკუთრებით საყურადღებოა ძირითადი ტაძრის გუმბათის დაზიანება.
როგორც მინისტრმა აღნიშნა- კულტურული მემკვიდრეობის დაცვის სააგენტოს თანამშრომლები სასულიერო პირებთან ერთად აფასებენ შექმნილ მდგომარეობას და განიხილავენ პრობლემების მოგვარების გზებს.
დაუყოვნებლივ არის ასაგები ხარაჩო, რათა სპეციალისტებს მიეცეთ გუმბათზე მუშაობის საშუალება. მინისტრის თქმით, შეიქმნება საშუალოვადიანი პროექტი, რათა მომავალში ძეგლი მეტად იყოს დაცული მსგავსი საფრთხეებისგან.
როგორც ცნობილია, 25 ივნისის სტიქიის შედეგად გადახდილია გუმბათის თუნუქის საფარი, სამხრეთი კალთის სხვადასხვა ადგილიდან ამოგლეჯილია ლორფინის ქვები, დანარჩენ ადგილებში დაზიანებულია კრამიტის სახურავი, ჩამსხვრეულია ტაძრის დასავლეთი მხარისა და გუმბათის სარკმლები, დაზიანებულია სამრეკლოს თუნუქისა და საეპისკოპოსო სახლის კრამიტის სახურავები, ჩამოშლილია სასახლის აივანი, ტაძრის გუმბათიდან ჩამოვარდნილია ჯვარი და დაზიანებულია მიმდებარე ტერიტორიის ინფრასტრუქტურა.
