გივი წინწალაშვილი:
მე ვარ გივი წინწალაშვილი, ახმეტის მუნიციპალიტეტის სოფელ ბირკიანიდან. ეროვნებით ქისტი ვარ, მუსლიმი და „ერთიანი ნაციონალური მოძრაობის“ წარმომადგენელი. წლებია აქტიურად ვსაუბრობ სოფლის პრობლემებზე და ადგილობრივი ხელისუფლების საქმიანობას ვაკრიტიკებ.
ჟურნალისტი: რა საკითხზე გსურთ საუბარი?
გივი წინწალაშვილი:
მინდა საზოგადოებას ვუთხრა, რომ ჩვენი სოფლის მიმდებარე ტყის ნაწილი ადგილობრივ ხელისუფლებასთან დაკავშირებულმა პირებმა ფაქტობრივად მიითვისეს. მოსახლეობას ტყეში შესვლას უკრძალავენ, ხოლო თავად იქიდან დიდი რაოდენობით ხე-მასალა გააქვთ.
ჟურნალისტი: მოსახლეობას რატომ უკრძალავენ ტყეში შესვლას?
გივი წინწალაშვილი:
ხალხს ეუბნებიან, რომ ტყე დაცული ტერიტორიაა და იქ შესვლა არ შეიძლება. უბრალო ადამიანს ერთი ტომარა შეშის გამოტანისთვისაც აჯარიმებენ და პოლიციით აშინებენ. ამავე დროს, ხელისუფლებასთან დაახლოებული პირები სატვირთო მანქანებით შედიან და მოჭრილი ხეები გააქვთ.
ჟურნალისტი: პირადად გინახავთ ეს ფაქტები?
გივი წინწალაშვილი:
დიახ, მინახავს ტყიდან გამომავალი მანქანები, რომლებზეც მოჭრილი ხეები იყო დატვირთული. ასევე ვესაუბრე ადგილობრივებს, რომლებმაც ადგილზე ნახეს ხეების ჭრა და ტექნიკა. ხალხმა ყველაფერი იცის, მაგრამ ღიად საუბრის ეშინიათ.
ჟურნალისტი: თქვენი აზრით, ვინ დგას ამ ყველაფრის უკან?
გივი წინწალაშვილი:
ასეთი მასშტაბის უკანონო ჭრა ადგილობრივი ხელისუფლების მფარველობის გარეშე ვერ მოხდებოდა. შეუძლებელია, ტყიდან მუდმივად ხე გაჰქონდეთ და ამის შესახებ მერიამ, პოლიციამ ან შესაბამისმა სამსახურებმა არაფერი იცოდნენ.
ჟურნალისტი: რატომ გადაწყვიტეთ ამ თემაზე საჯაროდ საუბარი?
გივი წინწალაშვილი:
იმიტომ, რომ ტყე რამდენიმე გავლენიანი ადამიანის საკუთრება არ არის. ის ეკუთვნის სოფელს, ხალხს და მომავალ თაობებს. დღეს თუ გავჩუმდებით, რამდენიმე წლის შემდეგ შეიძლება ტყე საერთოდ აღარ დაგვხვდეს.
ჟურნალისტი: მუქარა ან ზეწოლა ხომ არ ყოფილა?
გივი წინწალაშვილი:
უკვე გამაფრთხილეს, რომ ამ საქმეში ჩარევას თავი დავანებო. მითხრეს, რომ გავლენიან ადამიანებს ვეხები და პრობლემები შემექმნება. როგორც ოპოზიციის წარმომადგენელს, ხელისუფლება ისედაც მტრად აღიქვამს. გარდა ამისა, ეროვნებით ქისტი და მუსლიმი ვარ და შიში მაქვს, რომ ჩემს წინააღმდეგ ეთნიკური და რელიგიური ნიშნითაც გამოიყენებენ მუქარას.
ჟურნალისტი: რას ითხოვთ შესაბამისი უწყებებისგან?
გივი წინწალაშვილი:
მოვითხოვ დამოუკიდებელ გამოძიებას. უნდა დადგინდეს, ვინ ჭრის ტყეს, ვის ეკუთვნის მანქანები, სად მიაქვთ ხე-მასალა და რა დოკუმენტების საფუძველზე მოქმედებენ. თუ ყველაფერი კანონიერია, ხელისუფლებამ ეს დოკუმენტები საზოგადოებას უნდა აჩვენოს.
ჟურნალისტი: რას ეტყოდით მოსახლეობას?
გივი წინწალაშვილი:
ხალხს ვთხოვ, შიშის მიუხედავად ხმა ამოიღონ და საკუთარი უფლებები დაიცვან. მე არავის მოვუწოდებ ძალადობისკენ. მხოლოდ სიმართლეს, კანონის დაცვას და ჩვენი ტყის გადარჩენას ვითხოვ.
