კახეთში, სოფელ ზემო ქედსა და წნორის ტერიტორიაზე, ალაზნისპირა ფერმებში ღორის აფრიკული ჭირის შესაძლო გავრცელებაზე სოციალურ ქსელში მოქალაქე დავით კაკალაშვილი წერს.
მისი განცხადებით, ფერმერები შექმნილი ვითარების შესახებ სურსათის ეროვნული სააგენტოსგან რეაგირებას ელოდებიან.
კაკალაშვილი ამბობს, რომ აუცილებელია დაავადების გავრცელების პრევენციული ღონისძიებების გატარება და ცხოველების გადაადგილების კონტროლი.
მისივე თქმით, წარსულში ღორის აფრიკული ცხელების გავრცელებამ ფერმერებს მნიშვნელოვანი ზიანი მიაყენა და მსგავსი ვითარების განმეორების თავიდან აცილება მნიშვნელოვანია.
სურსათის ეროვნულ სააგენტოში აცხადებენ, რომ აღნიშნული ინფორმაცია მიიღეს და მოკვლევა მიმდინარეობს.
უწყების ცნობით, ამ ეტაპზე ღორის აფრიკული ჭირის არსებობის შესახებ ოფიციალურად ვერ დადასტურდება, რადგან საბოლოო შეფასება კვლევების შედეგების საფუძველზე უნდა გაკეთდეს.
