პროფესიის არჩევა ძალიან მნიშვნელოვანი და საპასუხისმგებლო ნაბიჯია, რომელზეც დიდწილად არის დამოკიდებული მომავალი კეთილდღეობა. ამიტომ გადაწყვეტილების მიღებამდე უნდა გადაწყვიტოთ რომელ სფეროში გსურთ მუშაობა, რათა მიიღოთ არა მხოლოდ მატერიალური, არამედ მორალური კმაყოფილებაც.
საფეხურები:
იფიქრეთ იმაზე, თუ რა გსურთ თქვენი მომავალი პროფესიისგან
განსაზღვრეთ ვინ გსურთ გახდეთ, რის გაკეთებას აპირებთ, სად იცხოვრებთ, რისი მიღწევა გსურთ, საქმიანობის რომელ სფეროში იქნება საინტერესო მუშაობა, როგორი ცხოვრების წესის გსურთ გქონდეთ, რამდენად მნიშვნელოვანია მაღალი ხელფასი და სხვა.
გაითვალისწინეთ თქვენი შესაძლებლობები, ინტერესები და სურვილები
პროფესიულ საქმიანობაში წარმატების მისაღწევად აუცილებელია გქონდეთ უნარი იმ ტიპის საქმიანობისთვის, რომელიც მოგწონთ. ხოლო შესაძლებლობა არის პიროვნების ინდივიდუალური მახასიათებელი, რომელიც უზრუნველყოფს ნებისმიერი საქმიანობის წარმატებას, ათვისების სიმარტივესა და ამ საქმიანობის დაუფლებას. საკუთარი შესაძლებლობების იგნორირებამ შეიძლება არასწორი არჩევანი გაგაკეთებინოთ.
თუ საკუთარი ინტერესების განსაზღვრა გიჭირთ, არ მოიწყინოთ. შეეცადეთ გაარკვიოთ ისინი. თუ გინდათ რომ ბედნიერი იყოთ, დაკავდით საყვარელი საქმიანობით, კარგად უნდა გააცნობიეროთ საკუთარი სურვილები და გატაცება. რაც შეიძლება ადრე უნდა განსაზღვროთ ცხოვრებისეული მიზნები, რომ არ გადაეშვათ ისეთ პროფესიაში, რომელიც ცხოვრების ბოლომდე შეგძულდებათ.
ჰობი და ინტერესი ხშირად ემთხვევა შრომის ბაზარზე არსებულ შეთავაზებებს. მაგალითად, თუ გსიამოვნებთ კომპიუტერული თამაშების თამაში, შეგიძლიათ გახდეთ თამაშის დიზაინერი, ან პროგრამისტი. თუ მოგწონთ ხატვა ან ხელოვნება, შეგიძლიათ აირჩიოთ დიზაინერის ან არქიტექტორის პროფესია.
თუ არ ხართ დარწმუნებული თქვენს მიღწევებში, ჰკითხეთ სხვებს ამის შესახებ
ზოგჯერ გვიჭირს დავინახოთ ის სფეროები, რომლებშიც გამორჩეულები ვართ. თუ არ ხართ დარწმუნებული, რომ რაღაცაში კარგი ხართ, ჰკითხეთ ამის შესახებ თქვენს მშობლებს, ოჯახის სხვა წევრებს, მეგობრებსა და მასწავლებლებს. მათმა პასუხებმა შეიძლება გაგაკვირვოთ და გიბიძგოთ ისეთი ვარიანტებისკენ, რაზეც არც კი გიფიქრიათ.
გაიარეთ ტესტი
კარიერული ხელმძღვანელობის ტესტები ძალიან სასარგებლო ინსტრუმენტია მომავალი პროფესიის არჩევაში. ისინი დაგეხმარებათ ობიექტურად შეაფასოთ თქვენი შესაძლებლობები და ინტერესები, რაც დაგეხმარებათ აირჩიოთ ყველაზე შესაფერისი პროფესია ინდივიდუალური უნარების გათვალისწინებით. უმჯობესია ამის გაკეთება ფსიქოლოგთან, ან ეიჩარ სპეციალისტთან კონსულტაციის დროს. ეს ხელს შეუწყობს მიღებული შედეგებიდან ყველაზე სწორი დასკვნების გამოტანას.
გაითვალისწინეთ თქვენი ჯანმრთელობის მდგომარეობა
გარკვეული ფიზიკური მახასიათებლებისა და ჯანმრთელობის მდგომარეობის იგნორირება დაუშვებელია პროფესიის არჩევისას. უსაფუძვლოა იოცნებოთ სამუშაოზე, რომელსაც შეუძლია გააუარესოს თქვენი ჯანმრთელობა. ზოგიერთ შემთხვევაში, ჯანმრთელობის ზოგიერთი მახასიათებელი შეიძლება გახდეს გადაულახავი ბარიერი კონკრეტული სამუშაოს შესასრულებლად. მაგალითად, თუ გული გაწუხებთ, თქვენ პილოტი ვერ გახდებით, თუ ალერგია გაქვთ, ქიმიკოსობას უნდა აარიდოთ თავი და სხვა.
დეტალურად შეისწავლეთ პროფესიული მახასიათებლები
ყველა პროფესიას აქვს როგორც დადებითი, ასევე უარყოფითი მხარეები. უნდა გავითვალისწინოთ, რომ პროფესიის სახელწოდება მალავს მრავალ სხვა ფაქტორს და მახასიათებელს, ამიტომ თუ გარეგნულმა, მიმზიდველმა მხარემ გაგიტაცათ, შეიძლება გამოგრჩეთ მისი უარყოფითი მხარე. მომავალი პროფესიის გაგების ერთ-ერთი გზა პროფესიოგრამების შესწავლაა. პროფესიოგრამა არის კონკრეტული პროფესიის თავისებურებების აღწერა, რომლებიც ავლენს პროფესიული მუშაობის სპეციფიკასა და მოთხოვნებს.
გაანალიზეთ შრომის ბაზარი
შეაგროვეთ რაც შეიძლება მეტი ინფორმაცია იმის შესახებ, თუ რა პროფესიებზეა მოთხოვნა შრომის ბაზარზე. გაიგეთ, რა სამუშაოები იქნება მოთხოვნადი ხუთი წლის შემდეგ. მათგან აირჩიეთ თქვენთვის შესაფერისი რამდენიმე ვარიანტი. ამ შემთხვევაში დაგეხმარებათ მედია, დასაქმების საიტები, ასევე სოციოლოგების პროგნოზები, რომლებიც შეიძლება მოიძებნოს ინტერნეტში.
ესაუბრეთ იმ ადამიანებს, რომლებმაც აირჩიეს თქვენთვის საინტერესო პროფესიები
რაც უფრო მეტს გაიგებთ თქვენთვის საინტერესო პროფესიების შესახებ, მით უფრო მეტად იქნებით დარწმუნებული, რომ წინასწარ განჭვრიტეთ კონკრეტული პროფესიული არჩევანის ყველა შედეგი. ამიტომ, ნუ მოგერიდებათ ჰკითხოთ ნათესავებს, მასწავლებლებს, სხვადასხვა პროფესიის წარმომადგენელს. მათ შეუძლიათ გაგიზიარონ ღირებული ინფორმაცია საქმიანობის სფეროს შესახებ, მისი უპირატესობებითა და სირთულეებით. ასევე, სასარგებლო იქნება საგანმანათლებლო დაწესებულებების პოვნა, სადაც ისწავლება თქვენთვის სასურველი პროფესიები. აუცილებლად ეწვიეთ ღია კარის დღეებს. ამ ღონისძიებებზე თქვენ შეძლებთ გაეცნოთ თქვენი სასურველი პროფესიის სპეციფიკასთან დაკავშირებულ მნიშვნელოვან ინფორმაციას.
