კომპანია Toyota 2022 წლის პირველი სამი კვარტლის გაყიდვებით ლიდერი კომპანიაა მსოფლიოს მასშტაბით, ხოლო მისი მოდელი Corolla – ყველაზე გაყიდვადი მოდელი. ამის შესახებ ინფორმაციას Focus2move მსოფლიოს 162 ქვეყნის მონაცემზე დაყრდნობით ავრცელებს. მათი ცნობით Corolla-ს გაყიდვებმა ამ პერიოდში 840 ათასი ეგზემპლარი შეადგინა. მიუხედავად იმისა, რომ წინა წელთან შედარებით მისი გაყიდვები 5,6%-ით არის შემცირებული, ის მაინც გლობალური ლიდერია.
გაყიდვების მხრივ მეორე ადგილზე გავიდა Toyota RAV4, რომლის 654 ათასი ეგზემპლარია რეალიზებული. ის მსოფლიოს მასშტაბით ყველაზე პოპულარული ქროსოვერია, მიუხედავად იმისა, რომ მისი გაყიდვებიც 15,6%-ით არის შემცირებული.
ლიდერ სამეულს Ford F-Series ხურავს, რომელზეც ამერიკაში კვლავ მაღალი მოთხოვნა ფიქსირდება, მიუხედავად იმისა, რომ მასზეც 11,4%-იანი კლებაა. ის მსოფლიოს ყველაზე გაყიდვადი პიკაპია.
რეიტინგის პირველ სამეულში ვერ მოხვდა ელექტრომობილები, თუმცა Tesla Model Y-მ საპატიო მეოთხე პოზიცია დაიკავა, რომელიც წინა წელთან შედარებით მთელი 22 პოზიციით დაწინაურდა. მასკის ეს ელექტრომობილი 531 ათასიანი ოდენობით არის გაყიდული, რაც 101,6%-იანი მატებაა. მას მოჰყვება კიდევ ერთი Tesla — Model 3, რომელიც 492 ათასმა ადამიანმა შეიძინა (+22,6%).
ხუთეულს მიღმა არიან Toyota Camry, 489 ათასით (-4,9 %). Honda CR-V (449 ათასი, -21,7 %) და Chevrolet Silverado (433 ათასი, -4,1 %). რეიტინგს ხურავენ RAM (410 ათასი, -14,3 %) და კიდევ ერთი Toyota — Hilux (416 ათასი, +0,7 %).
ყველაზე დიდი ნახტომი რეიტინგში ჩინურმა BYD-მა გააკეთა, რომელიც წინა მეასე ადგილიდან მე-19 პოზიციაზე იმყოფება, მისი ელექტრომობილი Qin Plus კი 29-ე ადგილზე იმყოფება, მაშინ, როცა გასულ 2021 წელს ის მხოლოდ 141-ე ადგილზე იყო.
