კომპიუტერული პროცესორების ინდუსტრია მნიშვნელოვანი ცვლილებების წინაშეა – ისტორიულად ლიდერ კომპანია Intel-ს საბაზრო კაპიტალიზაციით მისმა უმთავრესმა კონკურენტმა AMD-მა გადაუსწრო.
მიმდინარე კვირის სავაჭრო სესიის დასრულების შემდეგ, AMD-ის საბაზრო ღირებულება 153.1 მილიარდ დოლარამდე გაიზარდა; Intel-ის კი 148.5 მილიარდამდე შემცირდა.
საგულისხმოა, რომ უოლ-სტრიტის ბოლო სავაჭრო სესია Intel-ისთვის უაღრესად არასახარბიელო შედეგით დასრულდა – კომპანიის აქციების ღირებულება თითქმის 9%-ით დაეცა, რაც იმედგამაცრუებელი კვარტალური შედეგების გასაჯაროებითაა განპირობებული.
ფინანსური ანგარიშგებიდან ირკვევა, რომ Intel-მა მეორე კვარტალში 15.3 მილიარდი დოლარის შემოსავლის მიღება შეძლო, რაც მნიშვნელოვნად ჩამოუვარდება ანალიტიკოსების მიერ პროგნოზირებულ $18-მილიარდიან მაჩვენებელს. გასული წლის ანალოგიურ პერიოდთან შედარებით კომპანიის შემოსავლები 22%-ითაა შემცირებული, რაც 1999 წლის შემდეგ დაფიქსირებული ყველაზე ცუდი მაჩვენებელია. ასევე აღსანიშნავია, რომ II კვარტალი Intel-მა $453-მილიონიანი ზარალით დახურა.
კომპანიის წარმომადგენლობის განმარტებით, არასახარბიელო შედეგები მსოფლიოს მასშტაბით ეკონომიკური აქტივობის შემცირებით და ნახევარგამტარების დეფიციტითაა განპირობებული.
რაც შეეხება Advanced Micro Device-ს, კომპანია კალიფორნიაში 1969 წელს დაფუძნდა და ის მსოფლიოს მასშტაბით 16,000-მდე თანამშრომელს ასაქმებს. ერთკვირიან ჭრილში AMD-ის აქციების ღირებულება 9.1%-ითაა გაზრდილი; ხოლო ერთთვიანში ზრდის მაჩვენებელი +23.5%-ს შეადგენს.
