საქართველოში იანვარ-სექტემბერში საავტომობილო ზეთებისა და საავიაციო ნავთის იმპორტი გაიზარდა

„საქართველოში იანვარ-სექტემბერში საავტომობილო ზეთებისა და საავიაციო ნავთის იმპორტი გაიზარდა,“ – ამის შესახებ ნავთობპროდუქტების იმპორტიორთა კავშირი ავრცელებს ინფორმაციას.

„2022 წლის იანვარ-სექტემბრის განმავლობაში საცხებ-საპოხი მასალების იმპორტმა შეადგინა 15,94 ათასი ტონა, რაც 2,02 ათასი ტონით ანუ 14,5%-ით მეტია წინა წლის ანალოგიური პერიოდის მაჩვენებელთან (13,92 ათასი ტონა) შედარებით.

მიმდინარე წლის იანვარ-სექტემბრის განმავლობაში საცხებ-საპოხი მასალების იმპორტის ყველაზე დიდი მოცულობა განხორციელდა თურქეთიდან – 3,04 ათასი ტონა, რაც მთელი იმპორტის 19,1%-ს შეადგენს. შემდეგ მოდიან: ირანი – 2,89 ათასი ტონა (18,1%); რუსეთი – 1,85 ათასი ტონა (11,6%); გერმანია – 1,68 ათასი ტონა (10,5%) და სხვ.

2022 წლის იანვარ-სექტემბერში საავიაციო ნავთის იმპორტმა შეადგინა 94.7 ათასი ტონა, რაც 30,6 ათასი ტონით ანუ 47,7%-ით მეტია 2021 წლის ანალოგიური პერიოდის მაჩვენებელთან (64,1 ათასი ტონა) შედარებით.

მათ შორის, მიმდინარე წლის იანვარ-სექტემბრის პერიოდში საავიაციო ნავთის იმპორტის 59,6% (56,4 ათასი ტონა) განხორციელდა თურქმენეთიდან, 18,8% (17,8 ათასი ტონა) – თურქეთიდან, 13,8% (13,1 ათასი ტონა) – საბერძნეთიდან, 5,1% (4,8 ათასი ტონა) – ეგვიპტიდან, 2,7% (2,6 ათასი ტონა) – აზერბაიჯანიდან,“- ნათქვამია იმპორტიორთა კავშირის ინფორმაციაში.