11 ივლისიდან, გადასახადის გადამხდელები გარკვეული განცხადებების რეგისტრაციას მხოლოდ ელექტრონული ფორმით შეძლებენ

ფინანსთა სამინისტროს შემოსავლების სამსახური განმარტავს, რომ განცხადებების ელექტრონული ფორმით მომართვიანობის წახალისებისა და დისტანციური სერვისების პოპულრიზაციის მიზნით, მიმდინარე წლის 11 ივლისიდან მოქალაქეთა მომსახურების სერვისცენტრებში ვიზიტის დროს გარკვეული განცხადებების რეგისტრაცია შეიზღუდება. ამის შესახებ ინფორმაციას ფინანსთა სამინისტროს შემოსავლების სამსახური ავრცელებს.

მათივე ინფორმაციით, შეზღუდვა შეეხება: მეწარმე ფიზიკური პირისთვის მცირე ბიზნესის სტატუსის მინიჭებას; ფიზიკური პირისთვის საკუთარი შემოსავლების შესახებ ცნობის გაცემას და დღგ-ის გადამხდელად რეგისტრაციას.

„60 000-ზე მეტ ფიზიკურ პირს, უკვე გაეგზავნა საინფორმაციო ხასიათის მოკლე ტექსტური შეტყობინება შემოსავლების სამსახურის ელექტრონულ სისტემაში რეგისტრირებულ მობილურ ნომრებზე.

აქვე შეგახსენებთ, რომ სერვისების განვითარების სტრატეგიის ფარგლებში, თვითმომსახურების წახალისების მიზნით, შემოსავლების სამსახურში უკვე 452 ელექტრონული სერვისის მიღება არის შესაძლებელი.

დამატებითი ინფორმაცია შეგიძლიათ იხილოთ შემდეგ ბმულზე: https://rs.ge/LawNewsArchive?newsId=699“, – ნათქვამია ინფორმაციაში.