კულტურა

თელაველი გოგონას კარჩაკეტილობის ჟამს დაწყებული ბიზნესი – გაიცანით დინა თელავიდან

0

დინა…ასე იცნობენ თელავში გოგონას, რომელმაც საკუთარი უნარები სხვისი ბედნიერებისათვის გამოიყენა…

დინა ნაწიფაშვილმა, ხელნაკეთი, საოჯახო დეკორაციების შექმნა რამდენიმე თვის წინ დაიწყო. როგორც ამბობს,  პანდემიის გამო შექმნილმა ვითარებამ, მას ახალი შესაძლებლობები აღმოაჩენინა, რომლითაც შვილებთან ერთად ქველმოქმედებასაც ეწევა.

,,მე დინა ვარ, თელავიდან… ქართველი დედა, რომელიც ორ ვაჟკაცს უზრდის საქართველოს.. მყავს მეუღლე, რომელიც ჩვენს ქვეყანას ემსახურება…  ეს მე მეამაყება… გვინდა ჩვენი შვილებიც ისეთი პატრიოტები აღიზარდონ, როგორც ყველა ქართველს შეეფერება.

ჩემს ოცნებებზე რომ მოგიყვეთ, დიდი ჩამონათვალი არ არის, თუმცა ყოველთვის მინდოდა მეკეთებინა ისეთი საქმე, ოჯახსაც რომ გამოადგებოდა და ჩემი გაკეთებული საქმით, გაჭირვებულებსაც დავხმარებოდი. დღეს, შემიძლია ვთქვა, რომ ნაწილობრივ გამომივიდა. შეძლებისდაგვარად ჩემი პატარა წამოწყებით, ვეხმარები ოჯახებს, მათი საჭიროებებიდან გამომდინარე…”

როგორც უკვე აღვნიშნეთ, დინა ქმნის სხვადასხვა ხელნაკეთ ნივთებს, აქსესუარებს და სახლის დეკორაციებს. მისი ხელნაკეთი ნივთები, თუ აქსესუარები, ძირათადად ეროვნულ თემატიკას უკავშირდება. როგორც ის გვიყვება, საწყის ეტაპზე ეს სფერო ჰობის დონეზე აინტერესებდა, ხოლო შემდგომ საქმეს სერიოზულად მიუდგა, ნივთების პოპულარიზაციაზეც მალევე იზრუნა და ყველაფერი ეს,  შემოსავლის წყაროდ აქცია…

,,ყველაფერი საყოველთაო კარჩაკეტილობის დროს დაიწყო. მაშინ როდესაც ძალიან ბევრმა სამუშაო ადგილი და საყვარელი საქმე დაკარგა… თითქოს არაფრის კეთების დროს დადგა. სწორედ ამ დროს, ვიფიქრე, რატომაც არ უნდა მეცადა რაღაც ახალი, და აი შედეგიც…

ზუსტად ვიცოდი, რომ ჩემი წარმატება, როგორც ჩემი ოჯახისა და ახლობლების სიხარულის საწინდარი გახდებოდა, ასევე მათთვისაც ვისაც ყველაზე მეტად სჭირდება თანადგომა. მიხარია, რომ გამიმართლა და ჩემი ხელით ნაკეთი დეკორაციები ძალიან კარგად იყიდება. თითოეული ნივთის კეთებისას თავს არ ვზოგავ და ჩემს სულს ვდებ მასში, რადგან მჯერა, რომ თუ საქმეს სიყვარულით და თავდაუზოგავი შრომით არ აკეთებ, ისეთი არ იქნება, როგორიც წარმოგიდგენია.

ახლა კიდევ ერთი ოცნება მაქვს. მინდა ჩემი პატარა ბიზნესი უფრო გავაფართოვო. მაღაზია გავხსნა, სადაც დინას ხელნაკეთი ნივთების შეძენა იქნება შესაძლებელი. ჩემი პროდუქციის უდიდესი წილი მომხმარებლის სურვილების გათვალისწინებით არის დამზადებული. შეკვეთის აღების დროს ჩემი დიზაინით დამზადებული კოლექციის გარდა მომხმარებელს სრულ თავისუფლებას ვაძლევ. სამომავლო გეგმებზე ვფიქრობ, მინდა  გავძლიერდე, შემდგარი და კიდევ უფრო მეტად თავდაჯერებული გავხდე. თან, რაც მთავარია, შესაძლებლობა მომეცემა, გავზარდო შემოსავალი და ამით მეტი გაჭირვებული ოჯახის დახმარება შევძლო.”

დინა ნაწიფაშვილის დაწყებული საქმიანობა ქველმოქმედებისთვის მხოლოდ მის ამ საქმიანობას არ უკავშირდება. ის თელავის მოსახლეობამ ერთი წლის წინ, სწორედ პანდემიის დაწყების შემდეგ გაიცნო, რომელიც ახალგაზრდა მოხალისეთა ჯგუფში, მოხუცებისა და მრავალშვილიანი ოჯახების დასახმარებლა აქტიურად იყო ჩართული.

 

მეტი

მსგავსი სიახლეები

Back to top button
Close