“საქართველოში ალბათ 2-3 კვირაში კორონავირუსის ახალი ქვეშტამი “კრაკენი“ დომინანტი გახდება” – ამის შესახებ ალერგოლოგ-იმუნოლოგმა, ბიძინა კულუმბეგოვმა ეპიდვითარებაზე საუბრისას განაცხადა.
მისი თქმით, სახელმწიფომ ბევრი უნდა იმუშაოს, რომ ბივალენტური ვაქცინა ხელმისაწვდომი იყოს, რადგან მას დაცვის მეტი ძალა აქვს, ვიდრე ძველ, სტანდარტულ ვაქცინას.
“დღეს მსოფლიოში ყველაზე მეტად გავრცელებულია “ომიკრონის” “ბი5” ვარიანტი, მაგრამ რა თქმა უნდა, იანვრის თვეში სხვადასხვა ვარიანტები მოდის. რატომ აქვს ამას ჩვენი მოსახლეობისთვის და განსაკუთრებით დარგის ექსპერტებისთვის მნიშვნელობა? ის ვარიანტი, რომელსაც “კრაკენის” სახელით ვიცნობთ ჩვენ, ეს არის BXX15 ვარიანტი, ყველა სხვა “ომიკრონის” შტამისგან განსხვავებით ხასიათდება ყველაზე უფრო სწრაფი გავრცელებით. საქართველოში ალბათ 2-3 კვირაში “კრაკენი” დომინანტური ვარიანტი გახდება. ამაზე მიუთითებს მსოფლიოს ქვეყნების ტენდენცია.
როგორც უკვე ვთქვი, ის გავრცელების მაღალი მასშტაბით ხასიათდება, ჰოსპიტალიზაციის რიცხვი გაზრდილი არ აქვს, მაგრამ ვაქცინების მიმართ ეფექტურობა შემცირებულია. ერთი მნიშვნელოვანი ნიუანსი, რაზეც მინდა ვისაუბრო, არის ის, რომ სამწუხაროდ, ჩვენს ქვეყანას 2023 წლის იანვარშიც კი არ აქვს ბივალენტური ახალი ომიკრონზე მორგებული ვაქცინის არც ერთი დოზა. ახლა მეტი აქცენტი უნდა გვქონდეს დაავადების ადრეულ დიაგნოსტიკაზე, მკურნალობაზე, რათა ჰოსპიტალიზაცია შევამციროთ.
როგორც ვიცით, ყოველდღე 500-მდე ახალი შემთხვევაა და აქედან 300 ჰოსპიტალიზირებული. 300 თითქოს არ არის კატასტროფული ციფრი, მაგრამ ჩვენი საწოლფონდის გათვალისწინებით 300 ჰოსპიტალში მყოფი ადამიანი ცოტა ციფრი არ არის. ამიტომ დროულად უნდა იყოს ჩართული ოჯახის ექიმი, დაავადება გამოვლინდეს მალე და დაიწყოს მკურნალობა… მიუხედავად იმისა, რომ დაავადება დასუსტებულია, გლობალური საფრთხე ჯერ მოხსნილი არ არის და ჯანმო არ ჩქარობს, რომ პანდემია დასრულებად გამოაცხადოს” – განაცხადა კულუმბეგოვმა.
